Kamjenc. Třeći adwentny kónc tydźenja je zapósłanča Sakskeho krajneho sejma Elaine Jenčec (CDU) na Dźeń wotewrjeneho běrowa z woptawanjom wosuška za dobry skutk přeprosyła. Pjeć pjekarnjow z jeje wólbneho wokrjesa za to wosuški přewostaji. Mjez nimi běchu Zelnakec pjekarnja z Kamjenca, Martinec z Worklec a Zahrodnikec z Chrósćic. Za mały darik smědźachu wopytowarjo jich wosušk woptać a posudźować. Wunošk bě na dobro Dźěćaceje archi w Kamjencu. W běhu krótkeho časa nazběrachu tak 200 eurow, z kotrymiž dźěło zarjadnišća podpěruja.
Mnozy wobydlerjo běchu přeprošenje sćěhowali a wužiwachu składnosć, we wólnej atmosferje ze zapósłanču kaž tež z nawodnicu Dźěćaceje archi porěčeć. Roland Ermer, prezident Europskeho zjednoćenstwa pjekarjow a konditorow, akciju jako hósć podpěraše. Z nim so zajimcy skerje wo pjekarskich prašenjach rozmołwjachu. K poradźenju akcije přinošowaše Budyska Młoda unija ze samopječenym tykancom.
