Poslednje dny stareho a prěnje dny noweho lěta su dobra składnosć, minjene dwanaće měsacow bilancować a na přichodne nadawki zhladować. Dźensa wěnujemy so Worklečanskej gmejnje.

Worklecy (MČu/SN). Po posudku Worklečanskeho wjesnjanosty Clemensa Poldracka (njestronjan) bě lěto 2025 za jeho „gmejnu z wutrobu“, kaž so Worklecy same mjenuja, napjate a połne podawkow. W nachilacym so lěće steješe ponowjenje Serbskeje wyšeje šule „Michał Hórnik“ w srjedźišću.

Přihotujo saněrowanje šule su w februaru čestnohamtsku wottorhansku akciju přewjedli. Při tym pomhachu starši a wohnjowi wobornicy runje tak kaž młodźinski klub, gmejnscy dźěłaćerjo a dalši. „Bjez jich pomocy tajka akcija móžna była njeby. Na te wašnje smy tójšto pjenjez lutowali. Tohodla so wšitkim pomocnikam hišće raz wutrobnje dźa­kuju“, Clemens Poldrack zjima. Dalše přihoty měješe potom fachowa firma na starosći. W awgusće zahajichu dźěła we wobłuku hrubeho twara, elektriki, tepjenja a sanitarnych instalacijow.