Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (72)

Hara raketow a praskotakow posledni dźeń lěta poćežuje dźiwinu kaž tež domjace zwěrjata. Fobija před zwukami je pola psa sćěwk njemdreho praskanja, jelizo njeje mějićel psa wotpowědnje na silwester přihotował.

Někotre psy dožiwjeja hotowy trawma, kotryž stopnjuje so w nadměrnym strachoćiwym zadźerženju. Strachoćiwosć zadobywa so tež do wšědneho dnja. Podobne zwuki kaž w silwesterskej nocy móža paniku wubudźić, tak zo pos ćekny.

Jeli přežiwi pos samlutki silwestersku nóc abo něchtó zapali praskotak w bjezposrědnjej bliskosći psa, móže so fobija ćim spěšnišo a raznišo wuwiwać.

Fobija před wohnjostrojom zwuraznja so w njeměrnym zadźerženju psa. Pos dyrkota a jachli. Někotrym psam běža sliny. Druhe počinaja při praskanju wuć a winčeć. Dalše dyrbja bluwać, bywaja nječisći abo zalězu sej něhdźe, hdźež njejsu zwuki cyle tak wótře słyšeć.