Tradiciju serbskeje hodownički pěstuja hižo nimale 60 lět
Budyšin. Najebać zasněžene a zdźěla hładke puće bě minjenu njedźelu něhdźe 120 wěriwych přeprošenje na tradicionalnu serbsku hodowničku Budyskeje tachantskeje wosady sćěhowało. Hodownička wotmě so lětsa hižo 59. raz.
Na mjeztym zwučene wašnje běchu sej katolscy wosadni tež ewangelskich Serbow na žurlu biskopa Bena na Budyskej Tzschirnerowej přeprosyli. Zhromadne popołdnjo zahajichu z ekumeniskim nyšporom z tachantskim fararjom Witom Sćapanom, superintendentom Krystofom Rummelom a kapłanom Pětrom Mrózom w cyrkwi Našeje lubeje knjenje. Při prědowanju demonstrowaše farar Sćapan přitomnym dźěćom z eksperimentom „ćicheje póšty“, kak ćežko je, poselstwo ertnje dale posrědkować. Po tym namakachu dźěći běłe pjerjo w božim narodku. Pokazujo na to, zo móžeš z pjerjom mjez druhim pisać, nawjaza prědowar nitku k pisomnemu daledawanju hodowneho poselstwa.
