Wojerecy (KD/SN). Jedne z mnohich ­předewzaćow, kotrež chce Wojerowska Kulturna fabrika tele lěto zwoprawdźić, je Město dźěći 2026. Projekt wotměje so w prěnim tydźenju lětnich prózdnin na dźěćacej a młodźinskej farmje, a to wot póndźele hač do pjatka stajnje wot 10 do 12 hodź. a wot 14 do 16 hodź.

Zarjadowanje mjenuja „HoykiWojki“, a nimo němčiny ma w Měsće dźěći lětsa tež serbšćina z wobchadnej rěču być. Wšitke pokazki, taflički a dalše informacije maja dwurěčnje wuhotowane być. To samsne planuja za předawanišća, za dźěłowu agenturu dźěći, za wot dźěći wjedźeny hosćenc, za dźěćacu uniwersitu a dalše wobłuki. „Wšudźe změjemy dweju rozmołwneju partnerow, z kotrejuž ­jedyn tež serbsce rěči“, rozłožuje Ina Züchner z Kulturneje farbriki, kotraž ­projekt přihotuje.

Za Město dźěći zběraja hižo nětko plyšowe zwěrjata a dźěćace debjenki, kotrež móža holcy a hólcy w Kulturnej fabrice wotedać. W lěću budu je mali předawarjo za dźěćace pjenjezy předawać. W zakładnych šulach a hortach města Wojerecy chcedźa přichodne tydźenje wopon za Město dźěći naćisnyć. Wosebita jury ma najrjeńše naćiski mytować.