Radwor (SN/MiP). „W lěće 2025 smy někotryžkuli dołhodobny projekt zakónčili. Wusahowacy wjeršk drje běše přepodaće noweju wohnjowoborneju awtow za stejnišći w Radworju a Minakale dnja 3. oktobra“, Radworska wjesnjanostka Madeleine Rynčowa (njestronjanka) w rozmołwje z našim wječornikom rozprawja. Ze zaplanowanjom sumy za nakup jězdźidłow w hospodarskim planje 2021 běše wjesnjanostka tele předewzaće hižo kónc lěta 2020 nastorčiła, wšako z wosobinskeho nazhonjenja wědźeše, zo je za to tójšto ­časa trěbne. „Hižo 2021 smy so wo spěchowanske srědki wokrjesa požadać móhli“, wona wujasnja. Dźakowano zhromadnej skazance z gmejnu Dreiheide we wokrjesu Sewjerna Sakska móžachu te­hdy na jězdźidło kalkulowanu sumu něhdźe 495 000 eurow na kóncu nimale dodźeržeć. Hačrunjež běchu płaćizny w běhu lět stupali, wuńdźechu bjez přidatnych srědkow. ­„Tole so jara zrědka stawa“, wjesnjanostka wuzběhnje.