Hory (AK/SN). Gmejna Halštrowska Hola ze swojimi dźewjeć wjesnymi dźělemi steji při wuwiću łužiskeje jězoriny dale na čole. Tole podšmórnje wjesnjanostka Antje Gasterstädt (CDU) w swojim zhladowanju na lěto 2025. Najebać někotre ćeže je nětko wěste, zo móže so přistawnišćo při Parcowskim jězoru natwarić. Wone ma klětu hotowe być a lubowarjow wodoweho sporta, płachtakowanja a čołmikowanja přiwabjeć. Sčasami bě financowanje projekta njewěste. Problemy su mjeztym přewinjene. „Wažny měznik za region budźe 31. julij 2026. Potom budu Złokomorowski, Lejnjanski, Parcowski, Sedličanski a Rański jězor z kanalemi zwjazane“, připowědźa wjesnjanostka Halštrowskeje Hole. Twar přistawnišća koordinuje LMBV. Spěchowanske srědki we wobjimje 6,6 mio. eurow su mjeztym přizwolene. Jako prěnje ma mola nastać, kotrejž so přistawnišćo přizamknje.