Zubna lěkarka Evelyn Stübner-Patzig do ródneje wsy so nawróćiła

Bart (UM/SN). Spočatk tydźenja je zubna lěkarka Evelyn Stübner-Patzig w Barće w Malešanskej gmejnje zubnolěkarsku praksu wotewrěła. 37lětna rodźena Barćanka je sej z tym wjelelětny són spjelniła. „Sym sej hižo stajnje přała, zo móžu tu w swojej domiznje zubnolěkarsku praksu na wsy wjesć“, Evelyn Stübner-Patzig powěda.

Jeje puć hač k swójskej praksy bě dołhi a je so z praktikami pola jeje ćety, zubneje lěkarki Sylvije Michel, w Barće započał. „Na powołanju zubneje lěkarki je mje stajnje hižo wuski zwisk mjez medicinu a rjemjesłom fascinował“, Barćanka wuswětla. Jeje swójba, kotraž wuchadźa ze Stübnerec blidarskeje swójby, je hižo ­wjele generacijow w Barće zakorjenjena. Najprjedy je Evelyn Stübner-Patzig w praksy swojeje ćety powołanje zubnolěkarskeje fachoweje přistajeneje nawuknyła. Swój són, sama jako lěkarka skut­kować, pak ženje spušćiła njeje. Tuž je w Greifswaldźe při Baltiskim morju zubnu medicinu studowała.