Radwor (SN/MiP). Nimale w połnej ličbje je so Radworska gmejnska rada wčera wječor na swoje prěnje posedźenje w nowym lěće zešła. To njezadźiwa, wšako mějachu lětuši etat schwalić.
„Prawniski dohlad Budyskeho wokrjesa je gmejnje po pruwowanju našeho lětušeho etata zdźělił, zo chce jón schwalić“, informowaše komornica gmejny Melanie Mijanowa na spočatku swojich wuwjedźenjow. Kaž hižo loni, je tež w lěće 2026 etat Radworskeje gmejny w minusu. Lětuši minus je so porno lońšemu samo wot 740 000 na 1,26 milionow eurow zwyšił. Ale tež cyłkowna suma etata gmejny je wot 6,8 milionow eurow loni na 7,13 milionow eurow lětsa stupała. Přičina za přiběracy minus su mjez druhim lěto a spadowace dochody gmejny z přemysłoweho dawka, informowaše komornica. Wot 2023 do 2025 su dochody z dawka wot 1,32 milionow na 392 000 eurow woteběrali. „W Radworskej gmejnje mamy jenož małe předewzaća a rjemjeslniske zawody. W poslednich lětach přeco zaso zwěsćamy, zo mějićeljo zawoda hižo naslědnika njenamakaja, po tym zo su so na wuměnk podali“, Mijanowa wuwiće wupodstatni.
