Worklecy (SN/JP). Před něšto wjac hač šěsć lětami bě sej Kathrin Heine swój wulki són zwoprawdźiła, jako wosrjedź Worklec, hnydom pódla gmejnskeho zarjada mały frizerski salon załoži. Hdyž do njeho zastupiš, napadnje ći hłownje z drjewa wobstejace nutřkowne wuhotowanje.

Přećelna frizerka runje włosy třiha. Kaž sama praji, jej powołanje přeco hišće wjele wjesela wobradźa. Wone je jara wotměnjawe. Nimo toho ju stajnje ludźo wobdawaja. Nětko pak so we Worklečanskim salonje změny připowědźa. Kónc januara wón zawrje. Jedna z přičinow ­toho je mjeztym wočiwidna: Kathrin Heine wočakuje dźěćo. Dalša je, zo je w Njeswačidle přemysłowa ležownosć swobodna. Tuž je so frizerka rozsudźiła, tam nowy salon wotewrić.