Hamor (AK/SN). W Radebergu planowany a wot Swobodneho stata Sakskeje spěchowany wukubłanski centrum Hamorski wjesnjanosta Hendryk Balko (Hamorske wolerske zjednoćenstwo) z jasnymi słowami kritizuje. Sakska chce předewzaće ze 70 milionami eurow z fondsa za strukturnu změnu spěchować. „To pak su tak mjenowane brunicowe pjenjezy. To mje přesłapja. Po mojim měnjenju so tele pjenjezy wopak wužiwaja“, rjekny wjesnjanosta na zašłym posedźenju ­Hamorskeje gmejnskeje rady. „By wjele zaměrnišo było, hdyž by Sakska małe, strukturnje słabe gmejny w bywšej ­brunicowej kónčinje spěchowała. Předewšěm wone měli wot brunicowych pjenjez profitować.“

Kaž Balko dale zwurazni, by derje było, hdyž by so sakske knježerstwo zmužiło a na přikład škleńčersku šulu w Běłej Wodźe wožiwiło. Runje za sewjerny dźěl Zhorjelskeho wokrjesa je jasna strategija za změnu strukturow a za wotpowědne pjenjezy nuznje trěbna. „Ale město jasnych a zawjazowacych skutkow ležeše naćisk na blidźe a dóstachmy jenož poskitk za rozmołwu“, Balko na posedźenju radźićelow porokowaše.