Wětošow (SN/mb). Prjedy hač wjelelětny Wětošowski měšćanosta Bengt Kanzler přichodnu póndźelu swoje zastojnstwo naslědnikej přepoda, ma hišće kónčnu rozprawu wo słowjanskim hrodźišću w Radušu dopisać. Takrjec měšćanskim radźićelam sobu na puć, kiž maja so dale z Davidom Chmelíkom, wobhospodarjom tutoho twara, bědźić. Město drje bě Chmelíkej wupowědźiło, tón pak so tomu z prawiznikom wobara a njewoteńdźe. Po hodźoch bě so jemu poradźiło, dosć pjenjez nadeńć a swój dołh pola města skónčnje zapłaćić. Ale kaž Kanzler, kotryž je sam prawiznik, Serbskim Nowinam wčera wobkrući, płaći tule wotnajenske prawo za přemysło. Porno prawniskim postajenjam za wotnajeće priwatneho bydlenja to woznamjenja, zo hospodarska njespušćomnosć jako wopodstatnjenje za wupowědźenje dosaha. Tohodla město prawdźepodobnje skóržbu přećiwo Chmelíkej zapoda.