Budyšin (CS/SN). Hižo wjacore lěta za­běraja so na Budyskim Schillerowym gymnaziju we wosebitym kursu ze stawiznami sprjewineho města. Swoje najnowše slědźenja wěnowachu šulerjo časej politiskeho přewróta 1989/90 a jeho wšelakim aspektam. Njedawno su zajimcam w Kamjentnym domje předstajili, što běchu w měšćanskim archiwje wuslědźili. W srjedźišću při tym steješe, zo njejsu so wuznamne podawki tehdy jeničce we wulkoměstach wotměwali, ale tež w mjeńšich kaž Budyšinje. Ze swo­jimaj jastwomaj měješe město wosebity wuznam, stej Helena Ziesch a Jette Raupach zwěsćiłoj. Wonej běštej towaršnostne wuwiće přeslědźiłoj. Mjez druhim zwěsćištej, zo bě stejišćo NDR napřećo Serbam předewšěm na kulturny wobłuk wobmjezowane. Po přewróće mějachu Serbja prěni raz móžnosć, swoje zajimy njewotwisnje a demokratisce zastupować, šulerce rjeknyštej. Tehdy běchu prawniske zakłady za dołhodobny škit mjeńšiny nastali. Šulerce rozłožištej, kak wliw SED poněčim popušćeše, kak so ­nowe strony załožichu a kak ludźo swoje žadanja na puću zwuraznichu.