We łužiskej jězorinje spochi twarja. ­Jedne z wulkich twarnišćow budźe lětsa a klětu Šibojski jězor pola Wojerec. Tam inwestuja tójšto pjenjez, zo bychu infrastrukturu polěpšili.

Wojerecy (KD/SN). Šibojski jězor ma so jako bliskowočerstwjenišćo za wobydlerjow a za turistow we łužiskej jězorinje wutwarić. Tole je jedna z naprawow, kiž we Wojerecach a wokolinje w zwisku ze strukturnej změnu zwoprawdźa. Hač do lěta 1996 su w něhdyšej Šibojskej bru­nicowej jamje brunicu wudobywali. Pozdźišo je tam jězor nastał. Nětko je Sakska krajna direkcija planam přizwoliła, po kotrychž ma so při jězoru mola natwarić. Tam nastanjetej přistawnej mosćikaj, při kotrymajž změje dohromady 32 čołmikow městno. Nimo toho chcedźa tam připrawu zarjadować, z kotrejž hodźa so čołmiki do wody pušćić. Wotpowědne podłožki je prezident krajneje direkcije Béla Bélafi zašły štwórtk we Wojerowskej radnicy zastupjerjam města přepodał. Po jeho słowach budźe tale „maritimna infrastruktura wobličo Wojerowskeho regiona w přichodźe sobu postajować a budźe jedna z wizitnych kartkow města“.