Hamor (AK/SN). Promenadu na sewjernym pobrjohu Bjerwałdskeho jězora chce Hamorska gmejna rozšěrić dać. Tole su gmejnscy radźićeljo na swojim zašłym posedźenju wobzamknyli. Za to chcedźa cyłkownje 339 000 eurow inwestować. Gmejna nadźija so něhdźe 60 000 eurow spěchowanja z programa za polěpšenje regionalneje hospodarskeje struktury. Tónle program spěchuje tež turistisku infrastrukturu.
Promenadu při Hamorskim pobrjohu chcedźa na dołhosći 645 metrow wot třoch na štyri metry rozšěrić, a to wot stanowanišća hač k pobrjóžnej barje a dale hač k pobrjohej samomu. Nimo toho nastaja nowe ławki, wotpadkowe sudobja a móžnosće za přizamknjenje kolesow.
