Wjele pisanych wobrazow w póstniskim ćahu žonow w Kulowje

Kulow (SN/LMC). Šěre njebjo, miholenje a niske temperatury sobotu dopołdnja w Kulowje knježachu. Tola dypkownje napoł dwěmaj, jako so póstnicy žonow započachu, so miholić přesta. 127 skupin žonow w pisanych kostimach, wótře a z najlěpšej naladu po měsće ćehnješe. Wjedro hižo po prěnich metrach žanu rólu wjac njehraješe.

Sobuskutkowacy ćehnjechu jako zwěrjata, fantastiske figury abo jako hinaše kreatiwne twórby po měsće. Skupina citronow z mjenom „Limoncellos“ postara so wo błyšć na šěrym dnju. Tež Nowowješćanske sněžne kralowny ćehnjechu sobu po dróhach, wotpowědujo chłódnemu wjedru, kotrež pak nikoho njemyleše. Tež dalše serbske skupiny z pisaneje masy wusahowachu. Mjez druhim wuhladachu přihladowarjo skupinu Queen Juliena. Inspiracija za nju bě filmowa figura King Julien. Sroki ze serbskimi elementami so mjez syły ludźi měšachu, runje tak módre ptaki w stilu Rio de Janeira. Pančanki běchu jako sowy w skupinje z mjenom „Klosterfrauen Melissengeist“ po puću.