Při Bjerwałdskim jězoru přihotuja so na lětušu turistisku sezonu

Hamor (AK/SN). Hamorska gmejna přihotuje so na turistisku sezonu 2026 při Bjerwałdskim jězoru. Tole rjekny wjesnjanosta Hendryk Balko (Hamorske wolerske zjednoćenstwo) na zašłym posedźenju gmejnskeje rady. Wot 1. apryla budźe turistiska informacija wot srjedy hač do njedźele stajnje wot 10 do 16 hodź. wotewrjena. „W turistiskej informaciji při Hamorskim pobrjohu budźe Andrea Lange nowa sobudźěłaćerka. Wjelelětna kolegowka Regine Nicol je so na wuměnk podała. Wona pak dale ­wupomha“, tak wjesnjanosta.

Prjedy hač so najwšelakoriše turistiske wiki wotměja, předleži nětko nowy „Dowolowy magacin Hornja Łužica“. Na 67 stronach rozprawja žurnal wo poskitkach při Bjerwałdskim jězoru a we Wochožanskim parku błudźenkow.