Młodźinu nad Halštrowom za wuspěšne dźěło počesćili

Sulšecy (DFG/SN). Minjeny pjatk je „Młodźina nad Halštrowom“ ze Sulšec wo­sebite počesćenje dóstała. Wjesnym młodostnym přepodachu myto za zhro­madne a spomóžne čestnohamtske ­młodźinske dźěło we wsy. Biskopičanska Syć za dźěćace a młodźinske dźěło njeje jim jenož pokal přepodała, ale tež šek w hódnoće 300 eurow.

Bernadet Zellerowa jako zastupjerka syće rozłoži, zo sej jury chwaleše, kak młodostni moderne žiwjenje a tež tra­diciju a nałožki we wsy zwjazuja. Wuspěšne mjeno nadźěłali su sej bjezdwěla jako organizatorojo kóždolětneho swjedźenja „Wiesenbeats“, ale tež jako młodźina, kiž campruje, wo tykanc spěwa abo so w martrownym tydźenju před swjatymi křižemi modli. Předsydka Młodźiny nad Halštrowom Leoni Suchec je šek přijała a zdobom zwurazniła, zo wuspěšne młodźinske dźěło woznamjenja prawidłowne a zaměrne dźěło z młodymi ludźimi. Wosebje so wona wjeseli, zo su zašły čas dalšich młodostnych do młodźinskeho kruha witać móhli, tak zo maja nětko něhdźe 60 čłonow, doda młoda předsydka.