Serbski ewangelski domizniski dźeń we Wojerowskim regionje wuhotuje so w juniju 20. raz. Lětsa wotměje so zhromadnje z 80. serbskim cyrkwinskim dnjom.

Wojerecy/Spale (AK/SN). Po lěće 2011 wotměje so 20. serbski ewangelski cyrkwinski dźeń Wojerowskeho regiona dalši raz we Wojerecach a w Spalach. Přewjesć chcedźa jón zhromadnje z 80. serbskim ewangelskim cyrkwinskim dnjom 13. a 14. junija. Serbski ewangelski dźěłowy kruh kónc tydźenja intensiwnje přihotuje. „Započatk budźe 13. junija w 14 hodź. z wodźenjom po měsće pod hesłom ´Serbske Wojerecy´. Werner Sroka powjedźe wopytowarjow serbsce po měsće. Dalše wodźenje w němskej rěči nawjeduje Sigrun Nazdalina“, praji farar we Wojerecach a Halštrowskej Holi Heinrich Koch, kiž w dźěłowym kruhu sobu skutkuje. Do wobeju wodźenjow wotměja nutrnosć. Pozdźišo přizamknje so zhromadna zabawa w Lutherowym domje.