Serbske jutrowne wiki w Budyšinje tójšto wopytowarjow přiwabili
Budyšin (SN/MkWj). Hač pod třěchu połny ludźi bě Serbski dom w Budyšinje minjeny kónc tydźenja. Serbske jutrowne wiki – mjeztym 33. króć zarjadowane – su so wospjet jako wulki magnet wopokazali. Cyłkownje wjace hač 2 100 wopytowarjow su zamołwići sobotu a njedźelu witali. To wotpowěduje přerězkej minjenych lět, Spěchowanske towarstwo za serbsku ludowu kulturu jako zarjadowar informuje. Jenož lońše lěto bě z tysac ludźimi wjace wosobje wusahowace. Štóž do Serbskeho domu zastupi, bě hnydom wot nalětnjeje atmosfery wobkuzłany, kotruž bě Pěčkec zahrodnistwo z Holešowa ze swojimi zažnokćějakami stworiło.
