Slepo (JoS/SN). Kaž kóžde lěto w dojutrownym času je nětko w Slepjanskim Serbskim kulturnym centrumje zaso wosebita jutrowna wustajeńca widźeć. Lětsa wuhotuje ju debjerka jutrownych jejkow z Njeswačidła Sylvina Schilling. 72lětna je sej wuměłstwo debjenja hižo w starobje dźesać lět awtodidaktisce přiswojić započała. Serbske korjenje jeje swójba ­nima. Hižo jeje mać pak je so za tele wuměłstwo zajimowała a tak swójbnu tradiciju załožiła. Tu mjeztym tež wnučka Sylviny Schilling w štwórtej generaciji dale wjedźe.

W přehladce pokazuje Njeswačanka wjace hač 400 wóskowanych jutrownych jejkow, kotrež su zašłe lětdźesatki nastali. Při debjenju drje pomha jej předewšěm swójska inspiracija. Přiwšěm Sylvina Schilling kruće na to dźiwa, zo wužiwa tradicionalne serbske mustry. „W běhu lětdźesatkow sym swójski stil našła. Při batikowanju mam jednore barby najradšo a lubuju jasne formy. Bosěrowanje pak mi runje telko wjesela wobradźa. Při tym wužiwam najradšo brunu a zelenu přirodnu barbu. Wulkosć jejow žanu rólu njehraje. Debju jejka pocpule runje tak kaž te štrusa.“