Dźěwin (AK/SN). Hospodarske połoženje Dźěwinskeje gmejny wostawa dale jara napjate. Zo móhli mzdy přistajenych a wudawki za milinu, pitnu wodu a wopłóčki płaćić, wozmje gmejna najprjedy raz kasowy kredit. Na swojim zašłym posedźenju njejsu gmejnscy radźićeljo jenož hospodarski plan 2026 wobzamknyli, ale tež strukturny koncept, kiž płaći hač do lěta 2029.

Jako prěnju naprawu chce gmejna cyłkownje 24 000 eurow zalutować. Mjez druhim šmórnu wudawki za adwentničku rentnarjow, za prezenty wuměnkarjam-jubilaram a za abonement digitalnych nowinow. Swój tarif za milinu je komuna hižo změniła, tak zo móža tam wjace hač 5 000 eurow wob lěto zalutować. „Jenož z tymle strukturnym konceptom nam wokrjes hospodarski plan scyła schwali“, praji wjesnjanosta Sebastian Bertko. Adwentničku wuměnkarjow a mały dar za nich ke kulowatym narodninam spytaja přiwšěm wobchować. Tole pak chcedźa přichodnje z pomocu darow zmóžnić.