Worklečanscy radźićeljo wo naćisku hospodarskeho plana wuradźowali

Worklecy (JK/SN). To běchu štwórtk na posedźenju Worklečanskeje gmejnskeje rady dobre powěsće, kotrež komornica Katrin Kern wozjewi: Dokelž bě gmejna loni wjace dochodow z přemysłoweho dawka kaž tež wjace klučowych připo­kazanjow dóstała a dokelž njejsu hišće telko za wobnowjenje šule wudać trjebali, měješe kónc lěta nahladne mnóstwo likwidnych srědkow w swojej kasy. Tuž su derje do lětušeho hospodarskeho lěta startowali, w kotrymž wočakuje gmejnu zaso tójšto wužadanjow. To pokaza so při wuradźowanju wo naćisku lětušeho hospodarskeho plana, kotryž bě komornica nastajiła a radźićelam nadrobnje předstaji.