Njedawno su na přitwarje Kamjenskeho Lessingoweho muzeja zběhanku swjećili. To bě rjana składnosć, raz za kulisy twarnišća pohladać. Muzej ma so zaso z wuznamnym kulturnym srjedźišćom města stać.
Kamjenc (UM/SN). Rumnosće a chódby Kamjenskeho Lessingoweho muzeja su tuchwilu chětro prózdne. Hdźež běchu hišće před něhdźe lětom portrety wuznamneho, 1729 w Kamjencu narodźeneho rozswětlerja wisali a we witrinach eksponaty wo jeho tworjenju swědčili, widźi wopytowar aktualnje nahe sćěny, kotrychž wobmjetk je zdźěla wotklepany. Wulke wokna, z kotrymiž sy dotal na dwór a mały park hladać móhł, su swoju funkciju zhubili. Před nimi dźě je zašłe měsacy nowy přitwar dowysoka rostł. „Wot časa jeho natwara njeje so za naš dom hišće ženje telko pjenjez nałožiło“, rozłoži dr. Sylke Kaufmann, nawodnica Kamjenskich měšćanskich zběrkow, kotrymž tež Lessingowy muzej přisłuša. „W nowym twarjenju změjemy městno za wosebite wustajeńcy, kajkež je hišće nihdy měli njejsmy. Dom budźe wjele atraktiwniši hač dotal.“
