Großhennersdorf. Před 300 lětami, dnja 6. měrca 1726, zemrě w Großhennersdorfje Henriette Catharina von Gersdorff, wudowa hrabje Nikola II., kiž běše zastojnik kurwjercha w Drježdźanach a něšto lět krajny bohot Hornjeje Łužicy. Tu wobsedźeše tež někotre kubła. Po jeho smjerći přesydli so wudowa na swoje wobsydstwo w Großhennersdorfje.
Wot štwórtka hač do soboty minjeneho tydźenja wotměchu so tam kaž tež w bliskim Ochranowje najwšelakoriše zarjadowanja na česć a wopomnjeće derje kubłaneje a wulkomyslneje knjenje von Gersdorff. Wona njebě jenož jako awtorka němskich a łaćonskich basnjow znata, ale tež jako pietistka, kotrejž nabožne pismowstwo na wutrobje ležeše. Tak starosćeše so tohorunja wo serbske nabožne pismowstwo, zo móhli jeje serbscy poddanojo Bože słowo w swojej maćeršćinje přijimać.
