Radwor (SN/MkWj). Twarske naprawy wjetšeho rozměra wočakuja wobydlerjow w Radworju. Po jutrach zahaja dźěła na Dróze dr. Marje Grólmusec, a to wot kromy wsy hač na nawjes. Wo tym su na wčerawšim posedźenju Radworskeje gmejnskeje rady informowali. Potrjechenych wjesnjanow chcedźa 25. měrca na wobšěrnym zarjadowanju informować.

W nadawku wopłóčkoweho zwjazka „Mała Sprjewja“ zwoprawdźa tři wažne předewzaća: Ponowja dróhu, zatwarja rołu za dešćikowu wodu a połoža nowy wodowód za pitnu wodu. Nimo toho nastanjetej dwě bjezbarjernej busowej čakarni. Twarske dźěła maja po planje hač do oktobra trać. W tymle času dyrbja so wšitcy na wobšěrne wobchadne změny nastajić, dokelž budźe Dróha dr. Marje Grólmusec zawrjena.