Budyšin. Krajny gymnazij Sakskeje za hudźbu „Carl Maria von Weber“ (SLGM) woswjeći lětsa swoje 60ćiny. Składnostnje jubileja su sej šulerjo a wučerjo předewzali, swoje kubłanišćo, kiž ma wurjadny hudźbny profil, hišće znaćiše sčinić. Tuž wuhotuja po wšej Sakskej 60 koncertow.

Njedawno pobychu w Zhorjelcu, Lubiju a Žitawje. Za Budyšin pak su sej něšto cyle noweho a wosebiteho wumyslili: Chcychu předewšěm serbskich a słowjanskich komponistow předstajić. Intendant Serbskeho ludoweho ansambla Tomaš Kreibich-Nawka šulerjam poskići, swój wosebity koncert w nowej žurli ansambla wuhotować. Minjeny štwórtk móžeše intendant tam dźesać šulerjow a tři wučerki witać. Za serbsku a němsku připowědź steješe jemu Lubina Žurec-Pukačowa wot Towaršnosće za spěchowanje Serbskeho ludoweho ansambla poboku.