Wot Dobrošec hač k spjatemu jězorej nastanje kolesowanska šćežka

Dobrošecy (CS/SN). Wot Dobrošec w Malešanskej gmejnje hač k zwjazkowej dróze B 156 při Budyskim spjatym jězoru ma kolesowanski puć nastać. Prezident krajneje direkcije Sakskeje Bela Belafi je nawodźe Budyskeje wotnožki Sakskeho krajneho zarjada za dróhotwar a wobchad (Lasuv) Sebastianej Thieme pjatk tak mjenowane wobzamknjenje wo planowanskim zwěsćenju přepodał. Po słowach Belafija bě to „etapowy cil na dołhim a kamjenjatym puću ke kolesowanskej šćežce“. Tu sej mnozy wobydlerjo ­hižo dawno přeja. Nowa kolesowanska šćežka woznamjenja na jednym boku wěsćiši šulski puć za mnohe dźěći. Na tamnym boku budźe to wuznamna čara za turistow. Z pjatk přepodatym dokumentom je twarske prawo nětko zawěsćene a Lasuv smě šćežku twarić.