Na Krabatowym dworje w Jitku maja nowy wobchod a nadźijeja so prawje wjele kupcow. Tam njedóstanješ jenož wudźěłki Helmec ratarskeho zawoda, ale tež wot druhich poskićowarjow z regiona.

Jitk (JK/SN). Bě hižo dołho přeće a plan Helmec mandźelskeju, na Krabatowym dworje w Jitku wobchod zaměstnić a w nim twory ze swójskeje a regionalneje ratarskeje produkcije poskićować. Minjeny pjatk skónčnje tak daloko bě. We wobłuku tradicionalneje jutrowneje předanje su howjaze a wowče mjaso a dalše produkty z rězanja prěni raz w nowym wobchodźe předawali. Nawal kupcow bě – kaž přeco – jara wulki a štóž njebě sej wudźěłki sčasom skazał, dyrbješe hladać, hač hišće něšto dóstanje.