Na wjacorych městnach srjedźneje Łužicy zhromadnje jejka debili

Nowa Łuka/Brězowka/Rowno (JoS/SN). Mjeztym 35 lět přewjeduje Towarstwo za hajenje regionalneje kultury srjedźneje Łužicy stajnje bołmončku jutrowne wiki w Nowej Łuce. Minjenu njedźelu su so tam ze swojim wjelelětnym předsydu Wernerom Bejmu rozžohnowali. 84lětny bě towarstwo něhdy sobu załožił. Jeho skutkowanje hódnoćeše jeho dźowka Kirsten Bejmina. Zdobom spominachu na stolětne wobstaće Wjacsławkec drastoweho domu we Wojerecach, hdźež ma towarstwo dźensa swoje sydło. Dohromady 20 debjerjow serbskich jutrownych jejkow je w Nowej Łuce swoje filigrane wuměłstwo předstajiło. K zazběhej zarejwa dźěćaca rejwanska skupina z Noweje Łuki. Mjez rejwarkami bě 14lětna Tessa Kowalickec, kotraž wopytowarjow serbsce witaše.