Na zwučene wašnje nastaji so jutrowničku dźewjeć serbskich křižerskich procesionow na puć, zo bychu poselstwo wo zrowastanjenju wozjewjeli. Dźensa wozjewimy mały přehlad wo procesionach. Jich kantorojo a nawodźa su nam informacije sposrědkowali. Dalokož su nam znate, wozjewimy tež mjena jubilarow a nowačkow.

Runje telko křižerjow kaž loni je so lětsa za Ralbičanski křižerski procesion přizjewiło, mjenujcy 269, zdźěli organizatoriski nawoda Janek Wowčer. Dohromady změja dźewjeć nowačkow. To budu Feliks Handrik, Beno Eiselt, Józef Měrš, Glen Měrš, Kilian van Dorp, Nick Löschau, Antonius Wjenk, Ludwig Dittrich a Enrico Ryćer. Ze slěbornym wěnčkom pojěchaja 25. raz Fabian Wróbl, Tomaš Šołta, Bosćij Wowčerk, Měrćin Domš a Robert Ryćer. Runje tak kaž w Kulowje počesća tež w Delanach tych, kotřiž 40. raz sobu jěchaja. Lětsa budźetaj to Manfred Kral a dr. Beno Wałda. Złotych jubilarow drje w Ralbicach nimaja, za to pak jednoho křižerja z hišće žadnišim jubilejom. Jurij Čórlich pojěcha lětsa 60. raz sobu a změje tuž dejmantny wěnčk přityknjeny.