Křižowy puć w Zhorjelcu zwobraznja Jezusowe ćerpjenje a wumrěće
Njewobdźěleny přińdźe Jezusej na pomoc. Šimon z Cyreny, kotryž je zwonka města na polu dźěłał, chce domoj do města. Tola na přikaz romskich wojakow njese křiž ze zasudźenym Jezusom Nacaretskim. „Hač do Golgoty dyrbi sobu hić“, rozkładźe Savan Prajapati, indiski křesćan a dźensa domownik ewangelskeje wosady w Zhorjelskim nutřkownym měsće. We wobłuku ekumeniskeho křižoweho puća, kotryž zarjaduja organizatorojo ćichi pjatk wot Pětroweje cyrkwje k Swjatemu rowej, wón mjeztym hižo štyri lěta jako Šimon z Cyreny symbolisce wustupuje a 30 kilogramow ćežki drjewjany křiž sobu njese. „Njepřicpěwamy sej, Jezusa hrać. Njesemy jeho křiž symbolisce. Jezus je wšu winu swěta na so wzał. Wón njeseše swój křiž přez wšitke ćerpjenja hač do smjerće. Jeho ranow dla smy my čłowjekojo wuhojeni“, měni kěbětar Stefan Kranich, kotryž je wot lěta 2000 w přihotowanskim kruhu aktiwny.
