Po cyłej Łužicy su wobydlerjo zaso najwšelakoriše jutrowne wobrjady a tradicije pěstowali

Jutry w Serbach su kóžde lěto wosebite. Po cyłej Łužicy pěstuja najwšelakoriše nałožki a wobrjady. Wjeršk drje su za mnohich křižerske procesiony.

Budyšin (SN/DFG/MH/BŠe/bn/LuNo). Patokec kładźita bróžnja na Horach běše zeleny štwórtk kopaće połna. Wulka syła ludźi wopyta tam němsko-serbsku nutrnosć. Wšitke stólcy a ławki běchu wobsadźene. Po tym zo běše Birgit Patokowa hosći witała, swjećeše Wojerowski superintendent na wuměnku Friedhard Vogel nutrnosć. W swojim prědowanju wón na to pokaza, kotry zmysł ćichi pjatk a ćicha sobota matej a na kotry wjeršk so wšitcy křesćenjo přihotuja.