Chrósćicy (SN/MWj). 233 křižerjow je jutrowničku do Pančic-Kukowa jěchajo poselstwo zrowastanjenja wozjewiło. Mjez nimi bě wosom nowačkow a dźewjeć slěbornych jubilarow. Hinak hač w nimale wšitkich tamnych procesionach běchu w Chróšćanskim třo křižerjo wjace hač loni. Wosebje napjate bě, jako po nawróće do Chrósćic nadobo sirena wuješe. Po re­šeršach Serbskeho rozhłosa bě so mjez Worklecami a Smječkecami wobchadne njezbožo stało. Dokelž běchu wohnjowi wobornicy jako rjadowarjo nadróžneho wobchada zasadźeni, bě jich wobora oficialnje přizjewjena. W procesionje pak ke chutnišim njezbožam dóšło njeje.