Pančicy-Kukow (SN/MWj). Dožiwjenski dźeń za swójby słuša po jutrach do kruteho wobstatka zarjadowanjow w klóšterskej zahrodźe w Pančicach-Kukowje. Na njón přeprošuje Křesćansko-socialny kubłanski skutk jutře, srjedu, wot 14 do 18 hodź.

Kaž zamołwita za zjawnostne dźěło Uta Große zdźěli, wočakuje wopytowarjow pisany program z měšeńcu znatych a wupruwowanych kaž tež nowych poskitkow. Hižo wjele lět su wodźenja po klóštrje Marijina hwězda z paterom Johannesom woblubowane. Wojerowska dźěćaca a młodźinska farma budźe z někotrymi zwěrjatami na městnje, kotrež smědźa wopytowarjo majkać. Dale móža jutrowne jejka debić a paslić. Při staciji Budyskeho wokrjesneho sportoweho zwjazka poskića móžnosć, sakske dźěćace sportowe znamješko „Flizzy“ dóstać.