Trjebin (AK/SN). W Trjebinje maja w pěstowarni „Lutki“ hišće swójsku kuchnju. „To je wulki plus. Kuchar je pola twarskeho zawoda přistajeny. Mjeńše reparatury w kuchni wón sam wukonja“, rozłožo­waše wjesnjanosta Robert Sprejz (njestronjan) na njedawnym posedźenju gmejnskeje rady. Zdobom wšak zeńdźenje wunjese, zo dyrbi gmejna 1. septembra popłatk za wobjed w komunalnej pěstowarni zwyšić. Z tym reaguje gmejna na stupace kóšty za personal, za wobhospodarjenje a rjedźenje kaž tež za žiwidła. Komornica Dana Piehl wuswětlowaše, zo běchu jědź w pěstowarni posledni króć před lětomaj kalkulowali. Dźěćaca porcija ma w pěstowarni město dotal štyrjoch eurow přichodnje 5,40 eurow płaćić. W horće zwyši so płaćizna wot 4,50 eurow na 6,40 eurow a za dorosćenych wot wosom na 10,80 eurow.