W Němcach je mejemjetanje kóžde lěto z wjesnym swjedźenjom zwjazane. Serbski nałožk běše wospjet wjeršk kónctydźenskeho hejsowanja, kotrež bě syłu zajimcow přiwabiło.
Němcy (KD/SN). Bjez mejemjetanja sej domoródni a mnozy wopytowarjo kóždolětny wjesny swjedźeń w Němcach předstajić njemóža. „Lětsa běše meja 40 metrow wysoka, tak wysoka, kaž hižo dołho nic“, rjekny předsyda wjesneho młodźinskeho kluba Dennis Bilik sobotu před wulkej syłu wćipnych wopytowarjow swjedźenja. Samsny čas hłosowachu delnjołužiscy muzikanća swoje instrumenty. 17 holcow w katolskej narodnej drasće sej hišće raz swoju falu zhładkowa a pohlada, hač měca a bant derje sedźitej a hač rubiško prawje na ramjenjomaj leži. Za reju w porach z młodźencami pod meju na swjedźenskej łuce je wšitko tole wažne. K zahajenju zaklinča znata polka Hanamarja, na to Rheinländer a na kóncu nowši walčik „Rjany je čas młodosće“.
