Gmejnska rada bytostne nadawki za planowanje přepodała

Hamor (AK/SN). Hamorska gmejna chce klětu Swobodnu wyšu šulu w Hamoru ponowić. Na swojim poslednim posedźenju je so gmejnska rada jasnje k tomu wuznała. Jednohłósnje su radźićeljo přepodaće nadawka za planowanje, techniske wuhotowanje twarjenjow a elektrotechniku přepodali. Wobjim nadawkow wukonowych fazow 1 do 4 wučinja 24 500 eurow brutto. Wone wopřijeja zwěsćenje zakładow, předplanowanje, planowanje naćiskow kaž tež přizwolenjow. Nadawk přewozmje inženjerski běrow za management twarjenjow Volker Simson z Krušwicy. Zdobom gmejnska rada jednohłósnje planowanje za tepjenje, přewětrjenje a sanitarne připrawy wobzamkny. Tam je wobjim nadawka 25 700 eurow brutto. Jón ma inženjerski běrow za tepjensku a sanitarnu techniku Karsten Lehmann z Běłeje Wody wuwjesć. „Klětu chcemy saněrowanje zahajić“, podšmórny nawodnica twarskeho zarjada Cortina Kokles a doda: „Do toho ma planowanje jasne być.“