Towarstwo Nutřkowne město: Budyšin trjeba nowy profil

Budyšin (SN/mb). W nowej formje je tele dny prěni raz wokolnik towarstwa Nutřkowne město Budyšin z.t. wušoł. W nim skedźbnja předsyda cyłka měšćanskich předewzaćelow René Meißner čłonow na aktualne wužadanja. Zdobom dawa komunalnej politice a zjawnosći strategiski impuls. Pozadk toho je, zo wón po wjele zetkanjach a rozmołwach z partnerami turistiki a wikowanja w Budyšinje hižo wjacore lěta jasny spad registruje. Turizm jenož hišće něhdźe 60 procentow swojeho potenciala wučerpa, wikowanje 50 procentow. Powšitkowna nalada je skerje špatna dyžli dobra a spokojnosć hosći z přebytkom w měsće woteběra. Čas korona-pandemije je dlěšodobny negatiwny trend pospěšował. Přičiny su znate: Ludźo nakupuja lěto a wjac online, konkurenca Drježdźanskeho Łobjoweho parka a druhich stejnišćow je wulka, kóšty stupaja, personal pobrachuje. Ale tež jasna zhromadna linija w měšćanskim marketingu njeeksistuje.