Kamjenc (SN/MiR). W małej žurli Kamjenskeho dźiwadła knježeše wčera wječor wulka napjatosć. Zastupjerjo iniciatiwy Budyskich wokrjesnych radźićelow, z kotrychž su někotři tež Kamjenscy měšćanscy radźićeljo, rysowachu swój wid na šansu, porodźernju a gynekologiju w Kamjenskej chorowni swj. Jana zachować. Dotal njeje jednaćelstwo kliniki swój zaměr změniło, staciji njedźelu za tydźeń na přeco zawrěć. Kamjenski wyši měšćanosta Michael Preuß zwurazni: „Je wažne na region zhladować, nic jeničce na Kamjenc. Jenož tak stejimy politisce we fokusu. Pytamy za nošnym rozrisanjom.“