Łazowska gmejna chce Slěborny jězor turistisce dale wuwiwać

Łaz (AK/SN). Hišće lětsa ma za Slěborny jězor płaćiwy twarski plan předležeć. Z nim chce Łazowska gmejna jězor dale turistisce wuwiwać, rjekny Łazowski wjesnjanosta Thomas Leberecht (CDU) na zašłym posedźenju gmejnskeje rady. Po dorěčenju z nowymi wotnajerjemi su wjacore­ infrastrukturne předewzaća předwidźane. Cyle horjeka na lisćinje přećow steji multifunkcionalne twarjenje z modernymi sanitarnymi připrawami. „Pytamy nětko za kmanymi spěchowanskimi programami, zo móhli tele předewzaće zwoprawdźić“, praji Leberecht. Wot apryla ma Slěborny jězor wuwzaćnu dowolnosć, zo smědźa so tam ludźo kupać. Leberecht so nadźija, zo budu wudźerjo sewjerny dźěl jězora zaso wužiwać móc. Tón je hišće zawrjeny.