Njebjelčicy (SN/VaŽ). Na swój tradicionalny wjesny swjedźeń přeprošuja wot jutřišeho hač do njedźele do Njebjelčic. Kónc tydźenja ma lětsa znowa pokazać, kak čiła móže zhromadnosć być. Swjedźeń zjednoća zwučene poskitki z nowymi idejemi a skići wotměnjawy program za młodych a staršich, zdźěli młodźinski klub, kotryž swjedźeń hłownje organizuje.

Zazběh twori jutře wot 17 hodź. mjeztym štwórta party inkluzije „Danci“, kotraž drje budźe zaso wosebity wjeršk. Štož je so něhdy z ideju započało, je dźensa kruty wobstatk wjesneho swjedźenja. Nimo přeprošenych zarjadnišćow za čłowjekow z ćělnymi a duchownymi brachami z wokoliny wopytuje party tež lěto a wjace druhich hosći. Tole wobhladuja organizatorojo jako znamjo rosćaceje zahoritosće a wotewrjenosće. Tež lětsa smědźa so wopytowarjo na wosebite programowe dypki wjeselić, mjez druhim na inkluzisku band a na linedance. Wječor přizamknu so reje z překwapjenkami.