Kónc lěta maja fachowcy daty Europskej komisiji sposrědkować

Nowoslicy. (SN/jp) W zašłych tydźenjach a měsacach je so často wo Einsteinowym teleskopje a z nim zwisowacymi točenjemi we Łužicy rozprawjało. Točenja su trěbne, zo bychu slědźerjo kajkosće kamjenizny nastupajo na přikład zestajenje a homogenitu wuslědźili. Wčera staj profesoraj Drježdźanskeje Techniskeje uniwersity a Karlsruheskeho instituta za technologiju zajimcow na rozmołwu do Nowoslic přeprosyłoj. Do toho zetkachu so ze zastupjerjemi medijow, kotřiž móžachu fachowcomaj swoje prašenja stajeć a sej tak dohlady do jeju dźěła zdobyć. Astrofyzikar prof. Christian Stegmann, a geofyzikar prof. Andreas Rietbrock staj na prašenja wotmołwiłoj. Předewšěm dźěše wo aktualne połoženje. Mjez druhim staj podšmórnyłoj, zo točenja spěšnje pokročuja. Tak su w běhu dweju lět we Łužicy to nadźěłali, za čož trjebachu fachowcy na zapadźe Němskeje a Sardiniskej sydom lět. Tučasnje su hłubokosć 127 metrow docpěli, zaměr wšak je 240 metrow.