Załožba, towarstwo a město pytaja dale za rozrisanjom
Wojerecy (AK/SN). Kompjuterowy muzej Konrada Zuseho we Wojerecach wostanje hišće hač do kónca awgusta za wopytowarjow wočinjeny. Wot septembra budu jenož hišće skupinske wodźenja móžne. Tole zdźěli wčera předsyda rady załožby muzeja Steffen Markgraf. „Přihotujemy rozpušćenje załožby.“
Pozadk su masiwne pjenježne starosće muzeja. Město swoju kóždolětnu přiražku 25 000 eurow wot lěta 2027 hižo njepłaći. Z tym muzej tež žane spěchowanje kulturneho ruma hižo dóstać njemóže. Tež Wojerowska bydlenjotwarska towaršnosć swoju přiražku we wobjimje 110 000 eurow cofnje. Po měnjenju Markgrafa njeje žaneje druheje móžnosće hač muzej zawrěć. Šesćom dźělnje přistajenym sobudźěłaćerjam ke kóncej lěta wupowědźa, takle postupuja tež nastupajo zrěčenja za telekomunikaciju a za rjedźenje.
