Strowota njeje samozrozumliwa. Kóždy je wjesoły, hdyž ju ma. Što pak móžeš za swoju strowotu činić? Z tym zaběra so serija Serbskich Nowin, za kotruž wjacori awtorojo pisaja. (5)

W lěću chce so wjele ludźi porjadnje zbrunić, dokelž woni bruny teint husto z rjanosću a žiwjenskim wjeselom zwjazuja. Při tym nastawa w koži pigment melanin, kotryž bańkowe jadra zaćěmni, zo by so DNA (twarski plan našeho ćěła) před škódnej energiju swěcy škitała. Melanin drje kožu derje před pruhami UV-B škita a tak wopalenju přez słónco zadźěwa, ale přećiwo pruham UV-A jenož mało wukonja. Wone zestarjenje kože a wutworjenje fałdow dołhodobnje pospěšeja a powjetšeja zdobom riziko za nastaće čorneho raka­ kože. Tohodla fachowcy poručeja, wužiwać šěrokopasmowy słónčny škit – njewotwisnje wot barby kože.