W Serbskich Pazlicach wjesny swjedźeń wjele wopytowarjow přiwabił

Serbske Pazlicy (AKr/SN). Pisany wjesny swjedźeń dožiwichu kónc tydźenja wobydlerjo w Serbskich Pazlicach a jich hosćo. Po lońšej 800. róčnicy prěnjeho naspomnjenja wsy bě přihotowanska skupina zaso pisany program zestajiła. Tak zahajichu swjedźeń pjatk z natočenjom piwa. Dźěćom pokazachu w stanje film wo dožiwjenjach małeje wowcy. Słódny popcorn při tym tež pobrachował njeje. Žortne nadawki spjelnjachu we wubědźowanju hornjeje přećiwo delnjej stronje hłowneje dróhi. Wobdźělnicy dyrbjachu mjez druhim z wuskim bokom hamora hozdźiki do zdónka drjewa klepać abo kicker ze wosobami hrać. Prěni raz doby hornja strona dróhi. Po tym podachu so dźěći na lampionowy ćah z přewodom akordeona, kotryž hraješe Pawl Haška. Jako so holcy a hólcy na swjedźenišćo nawróćichu, so hišće na dźěćacej diskotece porjadnje wucychnowachu.