Wot spočatka lěta Markus Koppatsch na tym dźěła, sej z tradiciskim hosćencom swój žiwjenski són spjelnić. Poskitk pak budźe wjele šěrši, hač to mjeno „Hwězda“ lubi.

Wóspork (UM/SN). Jutře, sobotu, kofejownja „Hwězda“ na Wósporskim torhošću po wobšěrnym ponowjenju prěni raz zaso swoje durje wočini a wopytowarjow wita. Z tym sej Markus Koppatsch swój žiwjenski són wo swójskim hosćencu spjelni. „Sym powołanje w gastronomiji wuknył a najprjedy sydom lět w tymle wobłuku dźěłał“, wón powěda. Pozdźišo je Markus Koppatsch w překupstwje skutkował a so lubosće dla w bliskosći Wósporka zasydlił. „Přeće, jónu jako hosćićel dźěłać, je mje stajnje přewodźało. Tuž sym so rozhladował, hdźe móhł je zwoprawdźić.“ Předołho wšak Markus Koppatsch pytać njetrjebaše, wšako na swojim wšědnym puću na dźěło nimo „Hwězdy“ jězdźeše, kotraž je direktnje napřećo Wósporskej radnicy. Tuž nawjaza kontakt z wobsedźerjom domu. Lětsa w januaru móžeše swój són zwoprawdźić započeć.