W serbskich zawodach lětsa mjenje wučomnikow

Wotrow/Radwor/Kamjenc (SN/StŠ). Hdyž pytaš za wučomnicu abo wučomnikom, kotryž je před tydźenjom – na spočatku noweho wukubłanskeho lěta – swoje wukubłanje w serbskim zawodźe zahajił, dyrbiš chětro dołho telefonować a rešeršować. Přičiny za to su rozdźělne.

We Wjenkec blidarni we Wotrowje lětsa na přikład žanoho noweho wučomnika njezměja. To ma skerje priwatne přičiny, tak mějićel Marian Wjenk: „Mějach tójšto požadanjow a nad kóždym sym so woprawdźe wjeselił. Pječa je rjemjesło runje jara woblubowane a před krizami najskerje móhłrjec wěste. Přiwšěm sym so rozsudźił lětsa raz přestawku zapołožić a žanoho noweho wučomnika njepřistajić. Mam małe dźěći a chcu so kusk bóle wo swójbu starać, to dyrbi tež jónu być. Tuchwilu mamy w našim zawodźe jednoho wučomnika, kotryž je nětko w třećim wukubłanskim lěće. Klětu pak zawěsće zaso někoho přiwozmu“.