Kamjenc. (SN/MDź) Zaso zawjedźene awtowe znamješka ze starymi měšćanskimi skrótšenkami su jara woblubowane. W Braniborskej bu wot lěta 2012 něhdźe 421.000 tajkich čisłowych tafličkow wudźělenych. Tole bě Wysoka šula Heilbronn na zakładźe datow zwjazkoweho zarjada za nadróžny wobchad zličiła. Tež w Sakskej so dźeń a wjac jězdźidłow z něhdy wužiwanymi skrótšenkami přizwola. Wjac hač jedyn milion awtow, motorskich a připowěšakow běše wot 1. januara z tradicionalnym čisłom na dróhach po puću. Wot lěta 2012 smědźa wokrjesy a bjezwokrjesne města přidatne pismikowe kombinacije za znački přizwolić. Wosebje bywše skrótšenki so z tym zaso jewja, kaž značka KM za Kamjenc, a zbudźa pola mnohich ludźi zwjazanosć z domiznu, tak awtor studije Ralf Bochert. „Wosebje přez awtowu značku a z tutym zwjazanej indiwidualitu nastawa zwisk k identiće, štož je mnohim wažne.“ Tak wuhladaš tež na dróhach Budyskeho wokrjesa mnohe jězdźidła ze skrótšenku KM.