W Rachlowskej kapałce maja modernu techniku

Rachlow (AK/SN). Wšědnje připołdnju w dwanaćich zwón Rachlowskeje kapałki k modlitwje zwoni. Kóždy druhi štwórtk měsacach swjeća tu Božu mšu, jutrowničku so křižerjo wokoło kapałki hromadźa a zemrěje-li něchtó ze wsy, přichodny dźeń za njeboćičkeho zwonja.

„Naša kapałka je takrjec centrum wsy“, powěda Jan Balla. 78lětny a jeho mandźelska Wórša staj wjele lět zwón z ruku posłužowałoj. Starobnych přičin dla staj nadawk spušćiłoj. Do njeju činjachu to Hańža Kilankowa, Michał Mučišk, Madlena a Jurij Matješk a dalši wobydlerjo. „Jim wšitkim smy jara dźakowni“, praji Susanne Kockertowa. 61lětna wot lěta 2014 w Rachlowje bydli. Wot samsneho lěta je wona w Rachlowje wjesna předstejićerka. Kulowskej měšćanskej radźe pak přisłuša hižo wot lěta 2009.

Ballic mandźelskaj w Rachlowje mnoho nadawkow spjelnjataj. Hdyž něchtó ze wsy zemrěje, přiwuzni najprjedy jeju informuja. Na Božej mši wonaj kolektu zběrataj a do toho kapałku wupyšitaj. Nimo toho organizujetaj we wsy terminy za domyswjećenje.